Аудиторлық ұйымдардың азаматтық-құқықтық жауапкершілігін міндетті сақтандыру

Сақтандыру Қазақстан Республикасының 2003 жылғы 13 тамыздағы «Аудиторлық ұйымдардың азаматтық-құқықтық жауапкершілігін міндетті сақтандыру туралы» № 440-ІІ заңының негізінде жүзеге асырылады.

Аудиторлық ұйымдардың азаматтық-құқықтық жауапкершілігін міндетті сақтандырудың мақсаты – аудиторлық ұйымдардың аудит өткізуі кезінде мүліктік шығын келтірген тексерілімдегі субъектілердің мүліктік мүддесін сақтандыру төлемін іске асыру арқылы қорғау.

 

Сақтандыруға Қазақстан Республикасының заңнамасында белгіленген тәртіп бойынша аудиторлық қызметті жүзеге асыруға құқық беретін рұқсатқағазы бар аудиторлық ұйымдардың азаматтық-құқықтық жауапкершілігі жатады.

 

Сақтандыру жағдайы деп аудит өткізу кезінде тексерілімдегі субъектінің мүліктік мүддесіне келтірілген шығынның орнын толтыру бойынша сақтанушының азаматтық-құқықтық жауапкершілігінің басталу фактісі танылады.

 

Сақтандыру сомасы тараптардың келісімі бойынша, бірақ аудиторлық ұйыммен шартқа отыру күніне 10 000 АЕК-тен кем емес көлемде белгіленеді.

 

Жылдық сақтандыру тарифі сақтандыру сомасының 4,5 пайызынан аспауы шарт.

 

Сақтандыру мерзімі – 12 ай.

 

Сақтандыру төлемінің мөлшерін сақтандырушы тексерілімдегі субъект талап етіп отырған сома белгілі болған соң немесе келтірілген шығынның орнын толтыру туралы сот шешімінің заңды күшіне енуінен кейін анықтайды.

 

Рухани залал, жіберіліп алынған пайда, тұрақсыздық төлемі орнын толтыруға жатпайды.

 

Сақтандыру шарты бойынша сақтандыру сомасының 5%-нан аспауы тиіс шартты франшиза тағайындалады.